Les mots surlignés font l'objet d'une note
1Monsieur, encores que je ne vous aye onques faict service que mérite
2obtenir faveur de vous, si est-ce que me promectant avoir lieu au nombre
3de ceulx qui vous sont humbles serviteurs, je vous suplieray très humblement
4avoir pour recommandé le sieur du Bes, présent porteur, qui s’en va à
5Grenoble pour prendre le serment de l’estat de cappitaine de Baix dont
6il a esté porveu par le roy, auquel il a si bien et fidellement
7versé pour le bien du service de sadite majesté veu sa dilligence, soing et
8fidellité le rend assez en recommandation à l’endroy de ceulx à qui il a
9à respondre de sa charge. Il a à rendre compte de quelque partye
10pour le regard du péaige et aultres droictz de Baix et pource que sa
11présence nous est grandement requise par deçà pour la conservation
12des chasteaux et villes dudit Baix que j’ay remis soubz sa charge
13à cause des guerres et trobles que nous avons en cez quartiers,
14je vous suplieray très humblement commander qu’on le despêche
15et renvoye au plus tost que sera possible, vous asseurant monsieur
16que sa présence nous est réellement requise pour le lieu qu’il tyent
17comme le bien et faveur dont vous plairra user envers luy, le
18recepvray comme pour moy mesmes, augmentant de tant plus
19l’obligation et désir que j’ay de vous faire perpétuellement
20très humble service, à quoy me trouverez toute ma vye aussy affectionné
21qu’en saluant voz bonnes grâces de mes très humbles recommandations
22prye à Dieu vous donner
23Monsieur en parfaicte santé très longue et très heureuse vye. Du Teilh
24se XXVIII novembre 1572.
25Votre très humble et obéissant serviteur
26Leugières